सुकवि बुधराम यादव की लम्बी कविता "गाँव कहाँ सोरियावत हे" की अगली कड़ी भाग- 14 [ समापन भाग ] के रूप में प्रस्तुत है. इस अंक में " अंखमुंदा भागत हें " में कवि ने लोक और उसके महात्म्य को स्मरण किया है...
अंखमुंदा भागत हें
कहे भुलाइन कनिहा कोहनी
घुठुवा मुरूवा* माड़ी !
पिसनही जतवा* ढेंकी* अऊ
मूसर धूसर कॉंड़ी*!
पर्रा* बिजना* टुकना टुकनी
पैली* काठा खाँड़ी !
सेर पसेरी नादी* ठेकवा*
दीया चुकलिया* चाँड़ी !
लीटर मीटर किलो म अब
जिनिस ह जमो नपावत हे!
बटलोही* बटुवा थरकुलिया*
कोपरा कोपरी हंडा!
किरगी-किरगा* पाला* पौली*
अउ दरबा* सत खडा!
बटकी मलिया* गहिरही* ओ
हाथी पाँव कटोरा!
फूल कांस थारी म परसय
जेवन बहू अंजोरा!
अब फकत फाइबर चीनी के
घर घर सेट सजावत हें!
नींद भर रतिहा ले जागंय
अउ का म बुता ओसरावंय!
चटनी बासी टठिया भर
बेरा ऊवत पोगरावंय*!
हंसिया कुदरी धरे हाथ
मुंड़ म डेकची भर पानी!
पाछू पाछू चलय मंडलिन
आगू चलय जहानी!
अब तो आठ बजे जागंय अउ
चाह म चोला जुड़ावत हे!
राखड़ यूरिया अउ पोटास
संग कइ किसम के खातू!
कीरा मारे बर बिरवा के
कइ ठन छींचय बरातू!
साग पान के सर सुवाद ह
बिलकुल जनव परागे!
रसायन खातू के मारे
भुइंया जनव खरागे*!
अब तइहा कस बासमती न
महाभोग महावत* हें!
बावा भलुवा चितवा तेंदुवा
सांभर अउ बन भैंसा!
रातदिना बिचरंय जंगल म
बिन डरभय दू पैसा!
नसलवादी अब इंकर बीच
डारत हावंय डेरा!
गरीब दुबर के घर उजार के
अपने करंय बसेरा!
तीर चलइया ल गोली बारूद
भाखा ओरखावत हें!
जबरन मारंय पीटंय लूटंय
जोरे जमो खजाना !
बेटा बेटी अगवा करके
सौंपंय फौजी बाना !
हमर घर भीतर घुसरके
हमरे मुड़ ल फाँकंय !
जेकर हाथ लगाम परोसी
कस दूरिहा ले झाकंय !
कांकेर बस्तर जगदलपुर का
सरगुजा दहलावत हें!
देश धरम बर जीवइया ल
खाँटी दुसमन जानय!
कानून कायदा राज काज
हरके -बरजे* नइ मानय!
बिना दोष के मारंय पीटंय
लूटंय सकल उजारंय!
संग देवइया मन के जानव
कारज जमो सुधारंय!
बिरथा मोह के मारे मुरूख
बस दुरमत* बगरावत हें!
कतको चतुरा मनुख हवंय
चाहे कतको धनवंता !
कतको धरमी-करमी चाहे
अउ कतको गुनवंता !
कतको रचना रचिन भले
अउ धरिन बड़े कइ बाना
इहें हवय निसतार जमो के
का कर सरग ठिकाना !
अखमुंदा भागत हें मनो
पन-पंछी अकुलावत हें !
गाँव रहे ले दुनिया रइही
पाँव रहे ले पनही
आँखी समुहें सबो सिराये
ले पाछू का बनही !
दया मया के ठाँव उजरही
घमहा मन के छइहाँ
निराधार के ढेखरा* कोलवा
लुलूवा मन के बइंहाँ !
नवा जमाना लगो लउहा*
जरई अपन जमावत हें ।
हिंदी अरथ- घुठुआ मुरुआ -कलाई, जतवा- मिट्ïटी की बड़ी चकी जिसमें कोदो दला जाता है , ढेंकी- पैरों द्वारा धान कुटने हेतु लकड़ी से निर्मित उपकरन, कांडी- लकड़ी में बनाया हुआ गड्ïढा जहाँ अनाज भरकर कूटते हैं, पर्रा- बाँस से बना गोलाकार आकृति का पात्र, बिजना- बाँस से बना हाथ से झलने वाला पँखा , पैली- अनाज नापने की बाँस से निर्मित सबसे छोटी टोकनी, नादी- दिये से बड़े आकार का मिट्ïटी का पात्र, ठेकवा - पाव दो पाव तक तरल पदार्थ रखने का दोहनीनुमा मिट्ïटी का पात्र, चुकलिया - मिट्ïटी से निर्मित कटोरीनुमा पात्र , बटलोही- कांसे से निर्मित बटुवा से छोटा पात्र, थरकुलिया- कांसे से निर्मित छोटी थाली, किरगी-किरगा- अनाज रखने की कोठी, पाला- अनाज रखने की बड़ी कोठी, पौली- मिट्ïटी से निर्मित विशिष्टï अनाज रखने की छोटी कोठी , दरबा- कीमती वस्तुओं को रखने हेतु मिट्ïटी से बनी दरवाजे वाली कोठी , मलिया- कांसे की प्लेट, गहिरही- बासी आदि खाने के लिए कांसे से बनी गहरी थाली, पोंगारान्वय- अधिकार में लेना , खरागे- तपजाना, खरापन आ जाना, मम्हावत- खुशबू होना, हरके-बरजे- मना करना, दुरमत- कु मति, बैर -भाव, दुराग्रह, धेखरा- लताओं और बेलाओं को सहारा देने हेतु जमीन मे गड़ायी गयी पेड़ की डाली,लउहा- अविलंब, शीघ्र.
समापन
No comments:
Post a Comment