............महर महर महकय माटी.........
महर महर महकय माटी मोर लहर लहर लहरावय धान !
खेत मेढ़ मा ठाढे मगन मन मुचुर मुचुर मुसकावय किसान !!
जुरमिल बेटा-बहु सुवारिन
खेत के बन-कचरा निरवारिन !
जईसे जिनगी के गुन अवगुन
निरवारय कोई चतुर सुजान !!
महर महर महकय माटी मोर,
लहर लहर लहरावय धान !
झिमिर झिमिर बादर बरसय
धरती के चारों खुंट सरसयं !
सुध बुध बिसरे बांचय
दादुरजस के जानव पोथी पुरान !!
महर महर महकय माटी मोर,
लहर लहर लहरावय धान !
सुरूर सुरूर पुरवैया डोले
खर खर धान के पाना बोलय !
चिरईं चुरगुन जमो खार के
जुरमिल जनव मिलांवय तान !!
महर महर महकय माटी मोर,
लहर लहर लहरावय धान !
मेहनत के फल समुनहे पाके
तन मन के सब दुःख बिसराके !
चोंगी मा माखुर भर आगी
चकमक मा सुलगावय मितान !!
महर महर महकय माटी मोर,
लहर लहर लहरावय धान !
कनिहा मा ओठ्गाये तुतारी
धरे खांध मा रांपा कुदारी !
अलबेला अलखावत गावय
मोर धरती मोर जीव परान !!
महर महर महकय माटी मोर,
लहर लहर लहरावय धान !
महर महर महकय माटी मोर लहर लहर लहरावय धान !
खेत मेढ़ मा ठाढे मगन मन मुचुर मुचुर मुसकावय किसान !!
..................रचयिता.......
.सुकवि बुधराम यादव..
..........बिलासपुर..
No comments:
Post a Comment